المزاج
بلياك ماأعيش اليگلك عشت بعيوني احلفك منه تاخذ حذر
آنه اطمئن يمك واذا تبتعد من كلشي يمي آنه احس بخطر
الليل يدري شگد احبك لان وياك عيني تستلذ بالسهر
اذبل لحد ماارتوي بشوفتك چن سمبله الروح وعشرتك نهر
بلياك كلشي يصير مابي طعم ماأميز بين الورد والصخر
تمطر ترافه وآنه اخضر غزل وبگاع چفي قلمي يطرح ثمر
لو راد ياخذني القدر كلي الك بس لابيني وبينك يمر قدر
علمت روحي من زغر شوفتك ردتك صدگ تبقى نقش عالحجر
تشتاگ الك عيني اذا سافرت مثل النوارس من تحن للبحر
آنه شسوي بالنظر لو رحت من تمشي گلي حتى اضمه النظر
ماادور بحبك خساره وربح ماافكر بگلبي ربح لو خسر
كل اليهمني آنه احبك فقط حب لونه صافي ابيض من القمر
طير انت من مر بسما دنيتي وكر على روحي وعليهه استقر
يسكت غصن خلگي گبل لا تجي ينتضرك الريح بتحرك الشجر
بلياك گلبي يصير مابي نفع شيفيد گلي الغيم البلا مطر
عين الاشوفك بيهه احس تختلف مو نفس عيني البيهه اشوف البشر
مرات أحچي صورتك عالورق من اخلط احساسي ويه لون الصور
امشي بحياتي وأمعن بخطوتك حتى من اتيهك عالاقل الگه اثر
آنه من اعوفك جدمي يمشي بثگل ثگل الجدام الملت من السفر
ومن تمشي عني الكون احس يختنگ والعالم بكبره احس بي صغر
بس لمن تردلي ارداكتشف كلشي بمكانه وانت حبك كبر
